Plantun de Prouvènço

Pèr coumpara dos planto d'encò nostre

Carex olbiensis & Panicum barbipulvinatum

Queirello(-d'Iero)

Carex olbiensis

Cyperaceae

Àutri noum : Moutouso, Sagneto.

Nom en français : Laîche d'Hyères.

Descripcioun :
La queirello-d'Iero trachis souto lis aubre dins li bos fre de Prouvènço, subretout séusouso. Fai de mato emé de fueio larjo (3 à 8 mm) e bèn verdo. Li tijo, que porton uno espigo masclo e 1 à 3 femello laco, se giblon un cop maduro. Lis utriculo soun pulèu grosso de 4 à 6 mm emé un bè courtet de 0,3 à 0,8 mm. Lis escaumo, pounchudo, an uno costo bèn verdo (fotò).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 20 à 70 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 10 à 15 mm
Flourido : Printèms

Sòu : Si (Ca)
Autour basso e auto : 0 à 600 m
Aparado : Noun
Abriéu à jun

Liò : Bos fres - Suviero - Blachiero
Estànci : Termoumediterran à Mesoumediterran
Couroulougi : Estenoumediterrano
Ref. sc. : Carex olbiensis Jord., 1846

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.